Guverinoma ya Ghana yatangaje ko igiye gucyura abaturage bayo 300 babaga muri Afurika y’Epfo kubera ubwoba bw’urugomo rukorerwa abanyamahanga.
Minisitiri w’Ububanyi n’Amahanga wa Ghana, Samuel Okudzeto Ablakwa yatangaje ko abantu biyandikishije kuri ambasade ngo bacyurwe.
Abanyafurika y’Epfo bamwe bamaze iminsi bigaragambya barwanya abanyamahanga bo mu bihugu byo munsi y’ubutayu bwa Sahara bari mu gihugu cyabo mu buryo bunyuranye n’amategeko.
Afurika y’Epfo yigeze kuvuga ko abanyamahanga bari mu gihugu ari umutwaro ku gihugu bitewe n’ibikorwa by’urugomo byakozwe muri Mata 2026.
Ghana yamaganye ibikorwa by’urugomo bigaragara mu mashusho yagiye akwirakwira ku mbuga nkoranyambaga ivuga ko izita ku mutekano w’abaturage bayo.
Ibihugu nka Kenya, Malawi, Lesotho na Zimbabwe byasabye abaturage babyo baba muri Afurika y’Epfo kuguma mu rugo mu gihe cyose bamenye ko hari ibitero bigamije kwibasira abanyamahanga.
Nigeria na yo iherutse gutangaza ko abaturage bayo 130 basabye gucyurwa bakavanwa muri Afurika y’Epfo.
