Nkundabera Eric “Ruben” ukinira Les Amis Sportifs yegukanye Shampiyona y’Igihugu y’Amagare ya 2025 mu bagabo naho Mwamikazi Djazilla ukinira Ndabaga Women Cycling Team ayegukana mu bagore.
Abagabo n’abatarengeje imyaka 23 bakoze intera y’ibilometero 162 mu muhanda wa Batsinda-Nyacyonga-Nyabugogo-Shyorongi-Base-Gicumbi-Nyacyonga-Batsinda.
Abagore n’ingimbi bahagurukiye i Shyorongi bakomeza umuhanda wa Base – Gicumbi -Nyacyonga-Batsinda. Ni mu gihe abangavu bahagurukiye i Gicumbi bagasoreza i Batsinda.
Mu bagabo Nkundabera Eric “Ruben” wa Les Amis Sportifs niwe wahize abandi yegukana Shampiyona y’Igihugu y’Amagare ya 2025 akoresheje amasaha ane, iminota 13 n’amasegonda 48. Nkundabera yasize Ngendahayo Jérémie wa kabiri amasegonda 20 naho uwa gatatu aba Masengesho Vainqueur wasizwe amasegonda 21.
Mu bagore, Mwamikazi Jazilla ukinira Ndabaga Women Cycling Team niwe wegukanye Shampiyona y’Igihugu y’Amagare. Yakoresheje ibihe bingana n’ibya Ingabire Diane wa Canyon-SRAM Generation wari waratwaye shampiyona eshatu ziheruka aho bombi bakoresheje amasaha atatu, iminota 13 n’amasegonda 25 .
Ntirenganya Moïse wa Les Amis Sportifs ni we wegukanye Shampiyona y’Igihugu y’Amagare mu gusiganwa mu muhanda, mu cyiciro cy’ingimbi aho yakoresheje amasaha atatu n’amasegonda atatu.
Ntirenganya uvuye mu mwiherero w’imyitozo wa UCI, yakurikiwe na Twagirayezu Didier wa Kayonza Cycling Club we wakoresheje amasaha atatu n’amasegonda ane na Nkurikiyinka Jackson wa Nyabihu Cycling Team wakoresheje amasaha atatu n’amasegonda atanu.
Mu bangavu, hatsinze Masengesho Yvonne wa Ndabaga Women Cycling Team akoresheje isaha imwe, iminota 23 n’amasegonda 45 . Yakurikiwe na Uwiringiyimana Liliane ukinira Friends of Nature arusha amasegonda atatu mu gihe Ahishakiye Claudine wa Bugesera Cycling Team yaje ku mwanya wa gatatu aho yarushijwe amasegonda 11 n’uwa mbere.
Ku wa Gatandatu ho abari bahize abandi mu gusiganwa n’igihe kuri buri muntu ku giti cye, ni Niyonkuru Samuel mu bagabo na Nirere Xaverine mu bagore, bombi bakaba bakinira Team Amani.
