Bamwe mu bakozi ba Rayon Sports barimo abatoza, abaganga n’abandi barataka ubukene nyuma yuko bamaze amezi atatu badahembwa.
Mu Cyumweru gishize ni bwo iyi kipe yahembye abakinnyi bayo ukwezi kwa Gatatu gusa ntabwo uyu mushahara wigeze kugera ku bandi bakozi barimo n’abatoza babo.
Bamwe muri aba bakozi baganiriye na Kigali Today ducyesha iyi nkuru bavuze ko bumiwe batazi impamvu yabyo dore ko abayobozi bahemba abakinnyi gusa ariko abandi bakabihorera.
Bagize bati: “Twarumiwe, ntabwo tuzi impamvu bikorwa gutya. Bahemba abakinnyi ariko staff yo ntawe uyireba, duheruka guhembwa ukwezi kwa Mbere kandi nako twaguhembwe mu kwa Kane dukina na Marine FC, ubu tuberewemo ibirarane by’amezi atatu”.
Ntabwo ari umushara gusa kuko ubwo Rayon Sports yatsindaga Police FC mu mukino w’umunsi wa 27 wa shampiyona igitego 1-0 abakinnyi bahawe agahimbazamusyi kangana n’ibihumbi 160 Frw bakiri mu rwambariro ariko abandi bo ntibagahabwa.
Ubuyobozi bwa Rayon Sports ntacyo buratangaza kuri ubu bukene buvugwa muri iyi kipe iri ku mwanya wa mbere w’agateganyo wa shampiyona y’u Rwanda. Ibi bije mu gihe Rayon Sports iri mu rugamba rwo guhatanira igikombe cya shampiyona aho kugeza ubu iri ku mwanya wa mbere n’amanota 59 ikaba irusha APR FC iyikurikiye inota rimwe.
Abakozi ba Rayon Sports barimo abatoza barataka ubukene
