Minisiteri y’Ububanyi n’Amahanga ya Uganda yatangaje ko abakozi b’urwego rushinzwe abinjira n’abasohoka rwataye muri yombi abanyamahanga 231 barimo abakekwaho ibikorwa binyuranyije n’amategeko birimo ubwambuzi no gukina urusimbi.
Iyi minisiteri yasobanuye ko aba mbere ari Abanya-Nigeria 62 bafatiwe mu karere ka Adjumani mu majyaruguru Uganda tariki ya 27 Mata 2026, kandi ko byagaragaye ko bakoraga imirimo irimo ivugabutumwa nta ruhushya babifitiye.
Mu ijoro ryo ku wa 27 rishyira uwa 28 Mata, uru rwego rwataye muri yombi abandi banyamahanga 169 bari mu nyubako mu gace ka Bukoto-Ntinda mu Mujyi wa Kampala, bahakorera ibikorwa byinshi binyuranyije n’amategeko.
Abafatiwe muri iyi nyubako bakomoka muri Ethiopia, Pakistan, u Buhinde, Bangladesh, Ghana, Myanmar, Sri Lanka, Cambodge, Nepal, Indonesia na Malaysia.
Ubwo hakorwaga iperereza ry’ibanze ku bafatiwe i Kampala, bamwe basobanuriye uru rwego binjijwe muri Uganda binyuranyije n’amategeko babanje kubeshywa akazi.
Hari ikindi gice byagaragaye ko cyari gisanzwe mu bikorwa by’ubwambuzi bwifashisha ikoranabuhanga, abandi bake basanganwa ibikoresho bifashishaga mu bindi bikorwa bitemewe.
Iyi minisiteri yatangaje ko iyi nyubako abanyamahanga bafatiwemo i Kampala yashyizwemo ibyangombwa byose birimo restaurent kugira ngo abayibamo batazajya bakenera kujya hanze, bashyire umutima ku bikorwa bitemewe.
Biteganyijwe ko abanyamahanga bizagaragara ko barenze ku mategeko arebana ko kuba muri Uganda bazakurikiranwa n’ubutabera, abagize uruhare mu bikorwa binyuranyije n’amategeko bashyikirizwe izindi nzego zishinzwe iperereza.
