Umutoza Mukuru wa Al-Hilal SC, Laurențiu Reghecampf, yemeje ko bamaze gusinyisha myugariro w’Umunyarwanda Niyigena Clément wakiniraga APR FC.
Laurențiu Reghecampf yabitangarije mu kiganiro n’itangazamakuru cyabaye kuri uyu wa Kane, aho Al-Hilal SC iri kwitegura guhura na Mamelodi Sundowns muri CAF Champions League.
Ati “Twamaze gusinyisha myugariro wo hagati w’Umunyarwanda, turizera ko agiye kudufasha ariko byose bizaterwa n’uko azisanga mu ikipe.”
Mu gitondo cyo kuri uyu wa Kane, Chairman wa APR FC, Brig Gen Deo Rusanganwa, yari yemereye IGIHE ko iyi kipe yakiriye ubusabe bwa Al-Hilal SC ku wa Gatatu.
Niyigena Clément wari umwe mu bakinnyi bagenderwaho muri APR FC ndetse akaba ahamagarwa mu Ikipe y’Igihugu ‘Amavubi’, yari yongereye amasezerano y’imyaka ibiri muri Kamena 2024.
Icyo gihe ayo yari yahawe mu 2022 avuye muri Rayon Sports yari arangiye. Mbere yo kugera muri Gikundiro yari umukinnyi wa Marines FC.
Niyigena aherutse kuba umukinnyi mwiza w’umwaka muri Shampiyona y’u Rwanda ya 2024/25.
Muri uwo mwaka yari yafashije Ikipe y’Ingabo z’Igihugu kwegukana ibikombe bitatu ari byo Shampiyona, Igikombe cy’Amahoro n’Igikombe cy’Intwari.
