Ishyirahamwe ry’Umupira w’Amaguru mu Rwanda (FERWAFA), ryasabye imbabazi abafana bagiye kuri Stade Amahoro bazi ko batsindira ibihembo by’amafaranga birimo na 1.000.000 Frw ariko ntibikunde.
Byari biteganyijwe ko mu mukino wahurije Ikipe y’u Rwanda n’iya Bénin kuri Stade Amahoro, ku wa Gatanu, tariki ya 10 Ukwakira 2025, abafana bari guhabwa amahirwe yo gutsindira ibihembo birimo imyambaro n’icya miliyoni 1 Frw.
Bamwe mu bafana bageze muri stade hakiri kare, babajijwe ibibazo bitandukanye batsindira imyambaro yemewe y’Ikipe y’Igihugu ‘Amavubi’ n’imipira yo gukina.
Hari abandi bagombaga gutsindira ibihembo by’amafaranga byari byateganyijwe, ari byo 100.000 Frw, 200.000 Frw, 300.000 Frw, 500.000 Frw n’igihembo nyamukuru cya 1.000.000 Frw ariko barategereza amaso ahera mu kirere.
FERWAFA yashyize hanze itangazo yisegura kuri iki kibazo, igaragariza abakunzi ba ruhago mu Rwanda ko bizakosorerwa mu mikino itaha.
Yagize iti “Turamenyesha abakunzi b’Amavubi bari bemerewe gutombola mu bihembo by’amafaranga byari biteganyijwe gutangwa mu kiruhuko cy’umukino wahuzaga u Rwanda na Bénin ku wa 10 Ukwakira ko bitabashije gukorwa mu gihe cyari giteganyijwe.”
“Ferwafa ibijeje ko mu mukino ukurikira w’Amavubi makuru, umubare w’abatsinda uzikuba kabiri.”
Abafana ntibatashye bababajwe no kubura ibihembo gusa, dore ko n’Ikipe y’Igihugu y’u Rwanda yatakaje umukino ku gitego 1-0, cyatumye inabura itike yo kuzakina Igikombe cy’Isi cya 2026 kizabera muri Leta Zunze Ubumwe za Amerika, Mexique na Canada.
