Guverinoma y’u Rwanda yatangaje gahunda nshya yo gutanga inka 10,000 ku miryango ituye mu gace k’amashyuza, igamije kongera imbaraga ku butaka no kurwanya ibiza bikunze kwibasira uturere twa Musanze, Burera, Gakenke, Rubavu, Nyabihu, Ngororero na Muhanga.
Iyi gahunda ni igice cy’umushinga uzamara imyaka itanu witwa Volcanoes Community Resilience Project (VCRP), ugamije gufasha abaturage kongera gukoresha ifumbire y’imborera mu butaka bwabo.
Pamela Ruzigana, Umuyobozi w’ishami rishinzwe gusana no kurinda ibishanga muri Rwanda Water Resources Board (RWB), yavuze ko iyi gahunda igamije guteza imbere ikoreshwa ry’ifumbire y’imborera kugira ngo ubutaka burusheho kugira ubuzima bwiza.
Yagize ati: “Ifumbire y’imborera ifasha ubutaka kugumana ubushobozi bwo kunyunyuzamo amazi, ikabuteza imbere mu bwiza bwarwo ndetse ikanagabanya cyane amazi ajya ku isuri.”
Imibare ya Minisiteri ishinzwe Ibiza (MINEMA) igaragaza ko hagati ya Mutarama 2013 na Kamena 2023, ibiza byakomotse ku mihindagurikire y’ikirere byahitanye abantu 539 mu turere twatoranyijwe, abandi 316 bagakomereka bikomeye. Nanone, inzu 18,415 zangiritse naho 7,740.57 ha z’imyaka zirangizwa burundu.
Mu Karere ka Rubavu, hamaze gutangwa inka 40 mu mirenge ya Nyakiliba, Mudende na Cyanzarwe, uhereye ku bari muri gahunda ya Gira Inka. Umuyobozi w’Akarere ka Rubavu, Prosper Mulindwa, yavuze ko izi nka zizafasha abaturage mu guhangana n’imihindagurikire y’ikirere.
Yagize ati: “Izi nka zizafasha abaturage kubona ifumbire y’imborera yo gufata neza ubutaka, kuko gukoresha nabi cyangwa kurengera ubutaka nta fumbire bigabanya ubushobozi bwabwo bwo guhangana n’ingaruka z’imihindagurikire y’ikirere.”
Bamwe mu baturage bamaze kugenerwa izi nka batangaje ko bazibonamo igisubizo ku bibazo bahuraga na byo. Mukasine Speciose, umwe mu bahawe inka mu Murenge wa Nyakiliba, yavuze ko zizafasha umuryango we kubona ifumbire batari bafite ndetse zikabaha n’amata.
Yagize ati: “Izi nka zizatwunganira cyane kuko mbere kubona ifumbire byari ikibazo, none ubu twizeye kongera umusaruro w’ubutaka bwacu ndetse tugire n’amata yo gufasha abana.”
Uyu mushinga uteganyijwe kuzatuma abaturage bo mu gace k’amashyuza bongera gukoresha ubutaka neza, bikabafasha mu kongera umusaruro no gukumira ingaruka z’ibiza bisenya inzu n’imyaka buri mwaka.
