Kuri iki Cyumweru ni bwo hasojwe gukinwa imikino ya shampiyona mu bagore. Umwe mu mikino yakinwe ni uwo Rayon Sports WFC yari yakiriyemo Bugesera FC mu Nzove .
Uyu mukino warangiye amakipe yombi anganyije ibitego bibiri kuri bibiri nyuma yuko Gikundiro y’Abagore yari yabanje ibitego bibiri bya Jeannette Uwikunda na Diane Nyirandagijimana gusa Bugesera FC ikaza kubyishyura mu gice cya kabiri.
Rayon Sports WFC yahise ishyikirizwa igikombe cya shampiyona mu kwezi kwa 3 uyu mwaka mu mukino wo ku munsi wa 20 hakibura imikino ibiri ngo shampiyona irangire.
Iki ni igikombe cya kabiri cya shampiyona kikurikiranya ikipe ya Rayon Sports y’Abagore yegukanye nyuma yuko ariyo ifite igiheruka.
Iyi kipe mu myaka 3 gusa imaze ishinzwe ikomeje kwitwara neza dore ko kugeza ubu imaze kwegukana ibikombe 6.
Amakipe yamanutse muri shampiyona y’icyiciro cya kabiri nyuma y’uko shampiyona isojwe ni Matunda WFC na Macuba WFC.
