Kuwa Gatandatu tariki 13 Nzeri 2025 saa Tanu kuri KMC Stadium muri Tanzania ni bwo uyu mukino wa 1/2 wakinwe. Watangiye wihuta cyane amakipe yombi asatira. Ku munota wa 30 William Togui wa APR FC yafunguye amazamu ku mupira wahinduwe na Memel Dao imbere y’izamu.
Mu gice cya kabiri Al Hilal yaje isatira cyane ishaka uko yakwishyura ariko Ruhamyankiko Yvan aratabara. Ku munota wa 64 APR FC yashoboraga kubona igitego cya kabiri ku ishoti riremereye ryarekuwe na Ruboneka Jean Bosco.
Ku munota wa 83 Al Hilal yaje kubona igitego cyo kwishyura gitsinzwe na Abdelrazing Taha Iminota 90 y’umukino yarangiye amakipe yombi anganya igitego 1-1 bituma hitabazwa iminota 30 y’inyongera.
Muri iyi minota ni ho Al Hilal yahinduriyemo ibintu ubundi ku munota wa 93 Sunday Damilare atsinda icya 2 naho ku wa 107 Ahmed Salem atsinda icya gatatu. Umukino warangiye APR FC itsinzwe ibitego 3-1 ihita isezererwa muri CECAFA Kagame Cup 2025.
