Shampiyona y’u Bwongereza ‘Premier League’ yongeye guca agahigo ko gutanga amakipe icyenda mu marushanwa y’i Burayi, nyuma y’uko Crystal Palace yegukanye UEFA Conference League.
Mu ijoro ryo ku wa Gatatu, tariki ya 27 Gicurasi 2026, ni bwo ku kibuga cya Red Bull Arena kiri mu Mujyi wa Leipzig mu Budage, hakiniwe umukino wa nyuma wa UEFA Conference League.
Igitego kimwe rukumbi cyabonetse muri uyu mukino cyatsinzwe na Jean-Philippe Mateta ku munota wa 50, cyafashije Crystal Palace yo mu Bwongereza kwegukana igikombe itsinze Rayo Vallecano yo muri Espagne igitego 1-0.
Iyi ntsinzi yatumye u Bwongereza bukomeza kwandika amateka muri iri rushanwa rimaze imyaka itanu, kuko ari ikipe ya gatatu yo muri icyo gihugu iryegukanye nyuma ya West Ham United mu 2023 na Chelsea mu 2025.
Kwegukana igikombe kwayo byayihesheje itike yo gukina UEFA Europa League, kunatuma u Bwongereza bugira amakipe icyenda mu marushanwa akomeye i Burayi mu mwaka utaha wa 2026/27, nk’uko byagenze mu mwaka w’imikino wa 2025/26.
Iyi kipe yasoreje umwaka ku mwanya wa 15, yabaye iya gatatu yo muri icyo gihugu izakina muri iri rushanwa nyuma ya AFC Bournemouth na Sunderland zasoreje umwaka wazo ku mwanya wa gatandatu n’uwa karindwi.
Andi makipe yo mu Bwongereza azakina amarushanwa y’i Burayi harimo Arsenal, Manchester City, Manchester United, Aston Villa na Liverpool UEFA zizakina UEFA Champions League.
Ni mu gihe Brighton & Hove Albion F.C. yasoreje ku mwanya wa munani izakina irushanwa rya UEFA Conference League mu mwaka utaha w’imikino.
