Mu kiganiro Alyn Sano yagiranye na InyaRwanda, yavuze ko yamaze gufata icyemezo ntakuka cy’uko Album ye ya Kabiri izajya hanze mu 2026, anemeza ko indirimbo “Turn it Up” iri mu zizaba ziyigize.
Yagaragaje ko iyi Album nshya izaba irimo umwimerere mushya ujyanye n’icyerekezo cye cyo kwagura umuziki we ku rwego mpuzamahanga.
Uyu muhanzikazi amaze iminsi ari mu Mujyi wa Kampala muri Uganda, aho aherutse gukorera igitaramo cyahuriyemo n’abandi bahanzi barimo DJ Pius.
By’umwihariko, DJ Pius yanagize uruhare mu kwandika indirimbo “Turn it Up”, bikaba byagaragaje imikoranire yabo mu muziki wo mu karere.
Alyn Sano yibukije ko mu mpeshyi ya 2023 ari bwo yasohoye album ye ya mbere yise “Rumuri”, yakiriwe neza n’abakunzi b’umuziki.
Iyi album igizwe n’indirimbo 13, zigaragaramo umwihariko w’umuziki nyarwanda, zirimo n’aho yakoresheje ibicurangisho gakondo, Abasaamyi bo ku Nkombo n’ubundi bwiza butandukanye bw’umuco nyarwanda.
Indirimbo zigize album Rumuri zirimo: Inshuti, Lioness, Mama, Positive, Mwiza, Mariya, Umwihariko, Sakwe Sakwe, Kuki, Why, Rumuri, Warakoze na Bohoka.
Ku bijyanye na Album ye nshya, Alyn Sano ateganya ko izaba ikubiyemo n’indirimbo ze zimaze kujya hanze. Muri zo harimo “Tamu Sana”, aherutse no kuyikorera mu buryo bwa Acoustic, anifashishamo umuhanzi Davis D mu mashusho yayo.
Alyn Sano akomeje kugaragaza intambwe ikomeye mu muziki, aho Album ye ya Kabiri itegerejweho kuzana umwimerere mushya n’indi shusho y’urugendo rwe nk’umuhanzikazi w’u Rwanda uharanira kwigaragaza ku ruhando mpuzamahanga.
