Urwego rushinzwe Abinjira n’Abasohoka muri Uganda rwatangaje ko abagenzi binjira muri icyo gihugu batagisabwa kwerekana icyemezo cy’uko bakingiwe indwara ya ‘fièvre jaune’, mu rwego rwo koroshya ibisabwa abajya kugisura.
Nk’uko The Rio Times yabitangaje, uru rwego rwemeje aya makuru ku wa 2 Ukwakira 2026, rusobanura ko icyo cyemezo kitakiri mu nyandiko zisabwa abasaba viza binyuze ku rubuga rw’ikoranabuhanga.
Mu myaka ishize, icyemezo cyo kwikingiza iyi ndwara cyari kimwe mu byangombwa abinjira muri Uganda basabwaga.
Kuvanaho iki cyangombwa bizorohereza ba mukerarugendo, abagenzwa n’ubucuruzi, abanyamahanga batuye muri Uganda bagaruka muri icyo gihugu n’abandi bagenzi, kuko batazongera gusabwa kugaragaza ko bakingiwe kugira ngo barangize ibisabwa mu gusaba viza.
Iyi mpinduka ireba n’uburyo bwo gusaba viza hifashishijwe ikoranabuhanga, bukoreshwa n’abanyamahanga benshi mbere yo gufata indege zibajyana ku Kibuga Mpuzamahanga cy’Indege cya Entebbe.
Ni icyemezo kigiye kugabanya inyandiko abagenzi basabwa, kinabafashe kwirinda ibibazo bashoboraga guhura na byo bageze ku kibuga cy’indege badafite icyemezo cy’urukingo.
Ibi bije mu gihe Uganda ikomeje gushyira imbaraga mu guteza imbere ubwikorezi bwo mu kirere, ubukerarugendo n’ubucuruzi.
Imibare y’Urwego rushinzwe Indege za Gisivili muri Uganda igaragaza ko mu 2025, umubare w’abagenzi ku ngendo mpuzamahanga wageze kuri miliyoni 2,48, uvuye ku bagera ku bihumbi 118 mu 1991, ubwo urwo rwego rwashingwaga.
