Ikipe ya Manchester United FC yagize igihombo cya miliyoni 43 y’Amapawundi hataravamo imisoro mu mwaka w’imikino wa 2025/26, uba umwaka wa karindwi wikurikiranya ihomba, igihombo cyayo kigera kuri miliyoni 444 y’Amapawundi [miliyari 870,9 Frw].
Ku wa Gatatu, tariki ya 23 Nzeri 2026, ni bwo hashyizwe hanze uko ubucuruzi bwa Manchester United yo mu Bwongereza, bwakozwe mu mwaka ushize w’imikino.
Muri uwo mwaka wa 2025/26 wabazwe kugera muri Kamena 2026, Manchester United yahombye miliyoni 43 y’Amapawundi, byiyongeraho miliyoni 10 y’Amapawundi ugererayijwe n’umwaka wari wabanje wa 2024/25, aho yahombyemo miliyoni 33 y’Amapawundi.
Usibye mu 2019 yungutse miliyoni 19,8 y’Amapawundi, indi myaka yose yakurikiyeho yatangiye guhomba, ndetse mu 2022 bihumira ku murari kuko icyo gihe yahombye miliyoni 115 y’Amapawundi hataravamo imisoro.
Muri rusange imaze guhomba miliyoni 444 y’Amapawundi mu gihe kingana n’imyaka irindwi.
Mu mwaka ushize Manchester United FC itarakinnye UEFA Champions League, yagujijemo inguzanyo za miliyoni 689 y’Amapawundi. Aya yazamutseho miliyoni 52 y’Amapawundi ugereranyije n’umwaka wabanje.
Iyi kipe yishyuye amadeni y’abakozi agera kuri miliyioni 302 y’Amapawundi, harimo miliyoni 8,2 y’amapawundi yahawe Ruben Amorim wahoze ari umutoza wayo wirukanwe.
Manchester United yungutse miliyoni 46,9 y’Amapawundi mu kugurisha abakinnyi, harimo miliyoni 40 y’Amapawudi yaguzwe Alejandro Garnacho wagiye muri Chelsea.
Mu mwaka wa 2026/27, Manchester United yifuza kuzamura amafaranga izinjiza, akava kuri miliyoni 677,6 y’Amapawundi yariho akagera kuri miliyoni 760 y’Amapawundi.
Muri uyu mwaka w’imikino wa Shampiyona y’u Bwongereza, imaze gutsinda umukino umwe muri itanu imaze gukina iri kumwe n’umutoza Michael Carrick. Yanganyije imikino ibiri, atsindwa indi ibiri, mu gihe ibitego umunani yinjije ari na byo yinjijwe.
