Ihuriro AFC/M23 rirwanya ubutegetsi bwa Repubulika Iharanira Demokarasi ya Congo ryashinje ingabo z’iki gihugu kwirara mu basivili muri Komini ya Minembwe nyuma yo gutsindwa urugamba.
Mu cyumweru gishize, ingabo za RDC, iz’u Burundi, umutwe w’iterabwoba wa FDLR n’imitwe ya Wazalendo byagabye ibitero bikomeye mu nkengero za Minembwe, bigamije gufata iyi komini imaze hafi imyaka 10 igenzurwa n’umutwe wa MRDP-Twirwaneho.
Tariki ya 18 Kamena 2026, Umuvugizi w’ingabo za RDC mu Ntara ya Kivu y’Amajyepfo, Lt Reagan Mbuyi Kalonji, yatangaje ko bafashe Minembwe ariko ubuyobozi bwa Twirwaneho mu rwego rwa gisirikare n’urwa gisivili bwabiteye utwatsi.
Perezida wa MRDP-Twirwaneho akaba n’Umuyobozi wungirije wa AFC/M23 ushinzwe ubukungu n’imari, Dr. Freddy Kaniki, yatangaje ko ihuriro ry’ingabo za Leta ya RDC ritazigera rifata Minembwe.
Abarwanyi ba MRDP-Twirwaneho, babifashijwemo n’aba M23 bakoreshaga drones z’intambara, basubije inyuma ingabo za Leta RDC zasatiraga santere ya Minembwe, bazambura bimwe mu bice zagenzuraga.
Umuvugizi wa AFC/M23, Lawrence Kanyuka, yatangaje ko nyuma y’aho ingabo za Leta ya RDC zitsindiwe urugamba rwo muri Minembwe, guhera mu ijoro ryo ku wa 22 Kamena ziri kwirara mu basivili bo muri Bidegu, Gakenke na Mikenke, zibagabaho ibitero bya drones.
Kanyuka yagize ati “Ibi bitero byikurikiranya kandi byagutse byateje impfu z’abasivili benshi, bikomeretsa abandi benshi kandi abaturage babarirwa mu bihumbi bahunze.”
AFC/M23 yatangaje ko mu gihe ibi bitero bikomeje, izakomeza kurwanirira abasivili no kubarinda.
