Ikipe ya Kiyovu Sports igiye kwishyura amafaranga arenga Miliyoni 77 Frw nyuma yo gutsindwa mu rubanza yaregwagamo muri FIFA n’uwahoze ari umutoza wayo, Bipfubusa Joslin
Ni urubanza rwakomotse ku itandukana ry’impande zombi ryabaye mu buryo butanyuze mu mategeko nk’uko byemejwe na FIFA.
Tariki ya 15 Ukuboza 2024 ni bwo Bipfubusa Joslin yahagaritse akazi muri Kiyovu Sports kubera ibibazo by’amikoro byari byugarije iyi kipe.
Icyo gihe ubuyobozi bwa Kiyovu bwari bwafashe icyemezo cyo guhemba bamwe mu bakinnyi babanza mu kibuga gusa, bugasiga abasimbura ndetse n’abatoza badahembwa, ibintu byateje umwuka mubi muri iyi kipe yo ku Mumena.
Nyuma yo kuva muri Kiyovu Sports, Joslin yahise aregera iyi kipe muri FIFA asaba uburenganzira bwe. Mu rubanza FIFA yategetse Kiyovu Sports kwishyura amafaranga angana na miliyoni 77,530,000 Frw bitarenze tariki ya 14 Kamena 2026.
Ikipe ya Kiyovu Sports kandi yahawe integuza ko nitubahiriza iki cyemezo mu gihe cyagenwe, izafatirwa ibihano bikomeye birimo guhagarikwa imyaka itatu itemerewe kugura cyangwa kwandikisha abakinnyi bashya muri sisiteme ya FIFA.
Ibi bibaye mu gihe Kiyovu Sports iri mu bihe bitoroshye by’ubukungu ndetse iri gushaka uburyo bwo kongera kwisuganya mbere y’umwaka w’imikino wa 2026/27.
