Abahagarariye Minisiteri y’Ububanyi n’Amahanga y’u Rwanda na Uganda bahuriye mu nama ya komisiyo ihoraho ihuriweho (JPC) iri kubera i Kampala, bemeranya ko ibihugu byombi bizakomeza gusigasira umubano wa kivandimwe.
Iyi nama ibaye ku nshuro ya 12 iri kubera muri Mestil Hotel. Abahagarariye u Rwanda bayobowe n’Umuyobozi ushinzwe ubufatanye na Afurika, Gisa Teta, aba Uganda bakayoborwa n’ushinzwe ubufatanye n’akarere, Richard Kabonero.
Impande zombi zagaragaje ko ibihugu byombi bizongera imbaraga mu bufatanye mu nzego zirimo igisirikare, ubucuruzi, ibikorwaremezo, ibijyanye n’abinjira n’abasohoka no kubaka ubushobozi bw’abaturage.
Minisiteri y’Ububanyi n’Amahanga ya Uganda yatangaje ko ibihugu byumvikanye gukemura imbogamizi zigaragara mu bucuruzi, no gukorana mu rwego rw’ubuhinzi, inganda, ubwubatsi n’ibikorwaremezo.
Yagize iti “JPC2026 ya Uganda n’u Rwanda yagaragaje umubano wa kivadimwe uri hagati y’impande zombi n’ubushake bwa politiki buri hagati yabyo.”
Umubano w’u Rwanda na Uganda umaze igihe kinini uhagaze neza. Ushingira ahanini ku bufatanye mu nzego z’ingenzi zirimo iz’umutekano ndetse n’ubucuruzi.
