Impuzamashyirahamwe y’Umupira w’Amaguru muri Afurika (CAF), yongereye ibihembo bihabwa amakipe yitwaye neza iwayo, aho izajya yegukana CAF Champions League izajya ihabwa miliyoni 6$, iyatwaye CAF Confederation Cup ibone miliyoni 4$.
Kimwe mu bishishikaje Komite Nyobozi ya CAF iyobowe na Patrice Motsepe, ni ukongera ubushobozi bw’amakipe yo muri Afurika, hazamurwa ibihembo by’ayitabira amarushanwa mpuzamahanga.
Intambwe ya mbere yatewe mu 2025, ubwo CAF yongeraga ibihembo by’amakipe yitabira Igikombe cya Afurika, aho Sénégal iheruka kwegukana icyabereye muri Maroc yatahanye miliyoni 10$.
Kuri iyi nshuro hagezweho amakipe yitwaye neza iwayo, aho amakipe azitabira CAF Champions League na CAF Confederation Cup mu mwaka w’imikino wa 2025/26 yongerewe amafaranga yahabwaga.
Muri CAF Champions League amakipe azajya agabana miliyoni 19,6$ nk’ibihembo. Ikipe izegukana iri rushanwa izahabwa miliyoni 6$ (miliyari 8,7 Frw), iyabaye iya kabiri yo izabona miliyoni 2$ (miliyari 2,9 Frw).
Amakipe yaviriyemo muri ½ azajya abona miliyoni 1,2$ (miliyari 1,7 Frw), ayagarukiye muri ¼ abone ibihumbi 900$ (miliyari 1,3 Frw), naho amakipe azajya agarukira mu matsinda yo azajya abona ibihumbi 700$ (miliyari 1$).
Mu busanzwe ikipe yatwaraga iri rushanwa yahabwaga miliyoni 4$, itegeko ryatangiye gukurikizwa kuva mu 2023.
Muri CAF Confederation na ho ibihembo byongerewe, aho ikipe izegukana irushanwa ari yo izatwara miliyoni 4$ (miliyari 5,8 Frw), avuye kuri miliyoni 2$ (miliyari 2,9 Frw) yafataga kuva mu 2023.
Ikipe yabaye iya kabiri izahabwa miliyoni 1$ (miliyari 1,4 Frw), iyaviriyemo ½ ibone ibihumbi 750$ (miliyari 1 Frw), iyaviriyemo ¼ ihabwe ibihumbi 550$ (miliyoni 802 Frw).
Amakipe azajya ananirwa kurenga amatsinda, buri yose izajya ibona ibihumbi 400$ (miliyoni 583 Frw). Ibihembo byose muri iri rushanwa ni miliyoni 11,9$.
Amarushanwa yombi ageze muri ¼, aho Al Hilal SC iri kwitegura gukina na RS Berkane yo muri Maroc muri CAF Champions League, mu mukino uzabera kuri Stade Amahoro, tariki ya 20 Werurwe 2026.
