Ikigo cya mbere gitunganya ingufu nyinshi muri Ukraine DTEK (Donbass Fuel-Energy Company) cyatangaje ko abakozi bacyo 12 baguye mu gitero drone y’u Burusiya yagabye mu Burasirazuba bwa Ukraine.
Ni igitero cyagabwe mu gihe mu minsi ishize Donald Trump yari yavuze ko mugenzi we w’u Burusiya yari yamwijeje ko atazongera kurasa kuri Ukraine mu gihe kingana n’iminsi irindwi kubera ubukonje bukabije.
DTEK yavuze ko iyo drone yarashe kuri bisi yari itwaye itsinda ry’abakozi bari bagiye gusimbura abandi mu gice cya Dnipropetrovsk. Iki kigo cyavuze ko icyo gitero cyakomerekeje abantu barindwi.
Aba biyongera ku bandi bantu babiri baguye mu kindi gitero u Burusiya bwari bwagabye mu ijoro ryo ku wa 31 Mutarama 2026 hagakomerekamo abantu icyenda.
Mu bakomerekeye muri iki gitero cya mbere harimo abantu batandatu bakomerekejwe na drone yagonze bitaro by’ababyeyi muri Zaporizhzhia. Mu bakomeretse harimo n’abagore babiri bari bagiye kubyara nk’uko BBC yabyanditse.
Minisitiri w’Ububanyi n’Amahanga wa Ukraine, Andriy Sybiha, yavuze ko kugaba ibitero ku bitaro bigaragaza uburyo u Burusiya burajwe ishinga no kugaba ibitero ku basivili, ibihabanye n’imbaraga zikomeje gushyirwa mu bikorwa byo guhagarika intambara.
Ibitero kandi byahitanye abantu mu bice bya Dnipro, Kherson n’ahandi.
