Ikipe ya Rayon Sports na APR FC zishobora kongera gucakirana mu byumweru bibiri biri imbere ku mukino wa nyuma w’igikombe cy’Intwari cya 2026.
Ishyirahamwe ry’umupira w’amaguru mu Rwanda ryamaze kwandikira amakipe ane yabaye aya mbere muri shampiyona ishize ya 2024/2025 riyamenesha ko azitabira igikombe cy’Intwari. Ayo ni APR FC, Rayon Sports, Police FC na AS Kigali.
Ikipe yabaye iya mbere, APR FCa, izakina na Police FC yabaye iya kane naho Rayon Sports yabaye iya kabiri ikine na AS Kigali yabaye iya gatatu.
Bivuze ko amakipe y’amakeba, APR FC na Rayon Sports, ashobora kuzacakirana ku mukino wa nyuma, nyuma y’ibyumweru bibiri gusa bahuriye kuri Super Cup ya 2025 yegukanywe na APR FC itsinze Rayon Sports ibitego 4-1.
Mu bagore ho hazaba umukino umwe uzahuza Rayon Sports WFC na Indahangarwa WFC. Imikino ya 1/2 mu bagabo izakinwa tariki ya 28 z’uku kwezi. Umukino wa nyuma mu bagabo no mu bagore uzakinwa tariki ya 1 Gashyantare, umunsi n’ubundi usanzwe wizihirizwaho Intwari z’u Rwanda.
FERWAFA yavuze ko amasaha n’aho imikino izabera amakipe azabimenyeshwa. Igikombe giheruka cyegukanywe na APR FC itsinze Police FC ku mukino wa nyuma.
