Umusore wo mu murenge wa Mukarange mu karere ka Kayonza yiyahuye yimanitse mu mugozi bigakekwa ko yaba yabitewe n’uko ikipe ya Rayon Sports yari yarihebeye, yatsinzwe na APR FC mu mpera z’icyumweru dusoje dore ko hari n’urwandiko yasize yanditse asezera inshuti n’umuryango anashyiramo ko yababajwe n’intsinzwi yayo.
Abaturage babonaga nyakwigendara, bavuga ko yakundaga ikipe ya Rayon Sports ku buryo yahoraga afite iradiyo yahoragamo indirimbo z’ikipe yihebeye ndetse ngo n’iyo ikipe yakinnye, yisiga amarangi umubiri wose akajya kuyifana i Kigali.
Umuyobozi w’abafana ba Rayon Sports wavuze mu izina ry’ubuyobozi bw’iyi kipe, Muhawenimana Claude, yavuze ko Nizeyimana witabye Imana yari asanzwe amuzi ko ari umukunzi wa Rayon Sports mu buryo bukomeye kuko yakundaga kwisiga irange ry’ubururu n’umweru, yavuze ko bazakomeza kumwibuka nk’umwe mu bitangiye iyi kipe asaba abandi bafana kwirinda amarangamutima menshi yanatuma biyambura ubuzima.
