Mbere y’uko abasiganwa bava ku murongo, hari icyari kimaze kuba nk’ikizwi: niba hari umuntu washoboraga guhindura isiganwa rikarangira rihindutse amateka, uwo ntiyari undi uretse Pogačar. Ntibyatinze kwigaragaza. Yasize abandi akoresheje igitero cy’amakilometero arenga 100, maze agera ku murongo w’intsinzi ari wenyine, arusha abandi iminota irenga imwe. Kigali yabaye ikibuga cyemeje ko uyu Munyaslovenia ari umunyabigwi w’ibihe byose.
Inkuru itangira i Ljubljana
Tadej Pogačar yavutse ku wa 21 Nzeri 1998 i Ljubljana, umurwa mukuru wa Sloveniya, akurira i Klanec hafi ya Komenda. Ni umwana wa gatatu mu bana bane b’umuryango wicisha bugufi. Nyina, Marjeta, ni umwarimu w’igifaransa, naho se, Mirko, yabanje gukorera uruganda rukora intebe nyuma aza kwinjira mu buyobozi bw’ikipe yahoze ikinamo umuhungu we.
Sloveniya ntabwo yari izwi nk’igihugu gifite amateka akomeye mu mukino w’amagare. Ariko akiri muto, Tadej yagaragaje impano idasanzwe. Yatsindaga amarushanwa y’abasore bamurenze imyaka, bigaragaza ko yari afite ubuhanga budasanzwe.
Mu 2018, yatsinze Tour de l’Avenir, izwi nka “Tour de France y’ejo hazaza.” Icyo gihe, isi y’amagare yatangiye kubona ko habonetse umusore ushobora guhindura amateka.
Gutangira kwigaragaza
Mu 2019, yinjiye mu ikipe ya UAE Team Emirates. Ku myaka 20 gusa, yari amaze kwandika amateka: yatsinze Tour of California, aba umukinnyi muto cyane wegukanye isiganwa rikomeye rya World Tour.
Mu isiganwa rya Vuelta a España ryo mu mwaka umwe, yatsinze etape eshatu akarangiza ku mwanya wa gatatu muri rusange. Bityo, isi yose ibona ko izina rye rigiye kuba ry’ingenzi mu mateka y’amagare.
Ubukombe bwa Tour de France
Amateka nyakuri yanditswe mu 2020. Ku myaka 21 gusa, Tadej yigaruriye Tour de France mu buryo budasanzwe. Ku munsi wa nyuma w’isiganwa rya time trial, yambuye inshuti ye Primož Roglič umwenda w’umuhondo, atsinda isiganwa mu buryo bwatangaje isi yose.
Yabaye umukinnyi muto cyane watsinze Tour de France nyuma y’intambara, ndetse aba Umunyaslovenia wa mbere ubigezeho.
Mu 2021 yongeye kwegukana Tour de France, ashimangira ko ibyo yakoze mbere atari impanuka.
Umukinnyi wihariye
Tadej si umukinnyi wibanda gusa ku marushanwa manini y’amezi atatu (Grand Tours). Yatsinze Monuments ikomeye ku munsi umwe nka Liège-Bastogne-Liège, Tour of Flanders, na Il Lombardia. Ibi byamuhaye isura y’umukinnyi wuzuye, ushobora gutsinda ahantu hose – mu misozi, mu mihanda y’ibyondo cyangwa mu mihanda ikomeye.
Mu 2024, yakoze igikorwa cy’abanyabigwi: kwegukana Giro d’Italia ndetse na Tour de France mu mwaka umwe. Ibi byamushyize mu rwego rumwe na Eddy Merckx, izina rikomeye mu mateka y’amagare.
Mu 2025, yatsinze Tour de France ku nshuro ya kane, ndetse anegukana igikombe cy’isi i Kigali, ashyiraho uburyo bushya bwo gusiganwa: igitero cy’amakilometero arenga 100 wenyine.
Imibereho n’ubukungu
Uretse insinzi ku muhanda, Pogačar ni n’umukinnyi ukomeye mu bijyanye n’imibereho. Mu 2024, yasinyiye ikipe ya UAE Team Emirates amasezerano kugeza mu 2030, afite agaciro ka miliyoni 8 z’amayero ku mwaka, bimuha umwanya wa mbere ku rutonde rw’abakinnyi bahembwa menshi mu mateka y’amagare.
Amasezerano ye arimo n’igiciro cyo kumugura cya miliyoni 200 z’amayero – ikintu kidasanzwe mu mukino w’amagare. Urugero, mu 2025 Tour de France, ibyiciro n’amanota yatsinze byamwinjirije amafaranga asaga ibihumbi 627 by’amayero.
Imiterere y’umukinnyi
Afite uburebure bwa cm 176 n’ibiro 66, aboneka nk’umukinnyi ujyanye n’imisozi. Ariko kandi, ari mu ba mbere mu gusiganwa ku gihe (time trial). Ikintu kimuranga ni uburyo atinya gukora igitero akiri kure cyane, aho abandi baba bategereza. Ibi bituma afatwa nk’umukinnyi ushobora guhindura isiganwa rikaba igitaramo.
Ubuzima bwite
Nubwo ari icyamamare, Pogačar aba mu buzima bwisanzuye i Monaco. Afite fiancée, Urška Žigart, nawe ukina umukino w’amagare ku rwego mpuzamahanga. Žigart yegukanye inshuro nyinshi shampiyona ya Sloveniya mu gusiganwa ku gihe ndetse no mu isiganwa risanzwe. Bombi bafatanya urugendo rw’umwuga, bagashyigikirana mu buzima bwa buri munsi.
Ejo hazaza
Ku myaka 27 gusa, Tadej Pogačar amaze kwegukana Tour de France inshuro 4, Giro d’Italia, ibikombe by’isi bibiri, ndetse n’amarushanwa akomeye ku munsi umwe.
