Umuherwe w’Umunye-Congo wari utuye i Pretoria muri Afurika y’Epfo, Amisi Issa Vally, yarasiwe mu nyubako ya ‘Le Renaissance’ iherereye muri Komini Gombe mu mujyi wa Kinshasa mu ijoro ryo ku wa 9 rishyira uwa 10 Mata 2026.
Amashusho yafashwe na cameras zo mu nyubako Amisi yari yarayemo muri iryo joro amugaragaza yinjirana mu cyumba n’undi muntu bivugwa ko ari inshuti ye yitwa Mukena Mwepu Beni.
Mu wundi mwanya, uyu muntu agaragaza muri ‘ascenceur’ afite ikintu bikekwa ko ari umurambo wa Amisi, yirinda kwerekeza amaso neza muri camera, bigakekwa ko yirindaga kumenyekana.
Bivugwa ko uwo bikekwa ko ari Mukena yashoboye gusohoka muri iyi nyubako nta we umuketse. Nyuma y’amasaha make, umurambo wa Amisi wagaragaye inyuma ya hoteli iri hafi aho, ufite ibikomere by’amasasu.
Amisi w’imyaka 34 y’amavuko yari umushoramari ukomeye kuko yari afite ikigo gishakira abanyacyubahiro indege zihariye zo gukodesha, akaba Visi Perezida w’ikipe ya Nouvelle Vie Bomoko FC na Perezida w’ishyirahamwe rya Netball muri iki gihugu.
Hashingiwe ku bunararibonye Amisi yari afite mu mupira w’amaguru, Leta ya RDC yari yaramuhaye isoko ryo kuvugurura ikibuga n’intebe muri sitade y’igihugu, Martyrs, iri mu mujyi wa Kinshasa.
Minisitiri wa Siporo muri RDC, Didier Budimbu, yatangaje ko yashenguwe n’urupfu rwa Amisi, agaragaza ko yari umushoramari ukiri muto wagize uruhare mu iterambere rya siporo, binyuze kuvugurura sitade ya Martyrs.
Budimbu yasabye ko hakorwa iperereza rifatika kugira ngo icyatwaye ubuzima bwa Amisi kimenyekane.
Ku wa 13 Mata, Minisitiri w’Ubutabera muri RDC, Guillaume Ngefa, yatangaje ko Ubushinjacyaha bwatangije iperereza kugira ngo uwishe Amisi n’abandi bagize uruhare mu rupfu rwe babiryozwe.
Minisitiri Ngefa yatangaje ko yasabye ko iperereza ku rupfu rwa Amisi ryihutishwa, asobanura ko uwa mbere ukekwaho kwica uyu mushoramari n’abandi bikekwa ko bafatanyije bari gushakishwa n’inzego zibifitiye ububasha.
