Perezida w’Impuzamashyirahamwe ya Ruhago muri Afurika (CAF), Dr. Patrice Motsepe, yatangaje ko inkunga igenerwa amashyirahamwe arimo na FERWAFA yavuye ku bihumbi 525$ akagera ku bihumbi 700$ [asaga miliyari 1,03 Frw], na ho impuzamashyirahamwe mu turere zigahabwa ibihumbi 900$.
Ni umwanzuro watangajwe nyuma y’igihe gito hasojwe mu nama y’iminsi yahurije hamwe abayobozi b’umupira w’amaguru muri Afurika muri Cap-Vert, ku tariki ya 8 n’iya 9 Ukwakira 2026.
Kimwe mu byagarutsweho muri iyi nama ni ukongera ubushobozi bw’amashyirahamwe ya ruhago muri Afurika, hongerwa amikoro yayo mu buryo butandukanye.
Ni muri urwo rwego Perezida wa CAF, Dr. Patrice Motsepe, yatangaje ko ku nkunga yagenerwaga amashyirahamwe 54 buri mwaka. Iyi yiyongereyeho 33%, iva ku bihumbi 525$ [774.375.000 Frw], igera ku bihumbi 700$ [1.032.500.000 Frw].
Hongerewe kandi inkunga y’impuzamashyirahamwe z’uturere ibihugu bibarizwamo, aho yavuye ku bihumbi 750$ [1.106.250.000 Frw], agera ku bihumbi 900$ [1.327.500.000 Frw]. Iyi nkunga yiyongereyeho 20%.
Ishyirahamwe ry’Amakipe muri Afurica (ACA), ryari risanzwe rihabwa ibihumbi 400$ [590.000.000 Frw], rizajya rihabwa ibihumbi 500$ [737.500.000 Frw].
Kuva mu 2021, inkunga igenerwa amashyirahamwe ya ruhago iturutse muri CAF, imaze kuzamuka ku kigero cya 250%, ibigaragaza intambwe mu mupira w’amaguru muri Afurika.
Iyi nkunga ibonetse mu gihe n’Ishyirahamwe ry’Umupira w’Amaguru ku Isi (FIFA), riteganya gutanga miliyoni 25$ kuri buri shyirahamwe ryo mu bihugu 211 birigize, muri gahunda yo guteza imbere umupira w’amaguru izatwara miliyari 6,35$ mu myaka ine iri imbere.
