Umutwe wa MRDP-Twirwaneho ukorera mu burasirazuba bwa Repubulika Iharanira Demokarasi ya Congo (RDC) watangaje ko wakubitiye ingabo zishyigikiye ubutegetsi bw’iki gihugu mu mirwano yabereye mu Ntara ya Kivu y’Amajyepfo.
Umuvugizi w’ihuriro AFC/M23, Lawrence Kanyuka, yatangaje mu gitondo cyo ku wa 27 Nzeri 2026, ihuriro ry’imitwe ishyigikiye Leta ya RDC yagabye ibitero mu bice birimo Gipimo, Rugezi, Kuwihene no hafi yaho.
Kanyuka yagize ati “Ahagana saa kumi n’iminota 20, iri huriro ryagabye ibitero byinshi mu bice bituwe cyane mu karere ka Minembwe birimo Gipimo, Rugezi, Kuwihene no mu bice bibikikije. Ibi bitero byagabwe n’ingabo zirwanira ku butaka, zibifashijwemo na za mortier 82 mm na drones z’intambara.”
AFC/M23 kandi yatangaje ko saa mota n’iminota 20, ingabo za Leta ya RDC zagabye ikindi gitero mu gace ka Point Zéro, zikoresheje imbunda za mortier mm 107 na mortier 120 mm.
Kuri uyu wa 28 Nzeri, Col Fidèle Rugabo uri mu bofisiye bakuru ba MRDP-Twirwaneho yatangaje ko imirwano yabereye mu duce turimo Rugezi, Gipimo na Nzohaha yasize ingabo za RDC, iz’u Burundi, FDLR na Wazalendo zikwiye imishwaro.
Ati “FARDC, FNDB, FDLR na Wazalendo bakubiswe nk’ingoma i Rugezi, Gipimo na Nzohaha. Bose batataniye mu byerekezo bitandukanye. Twebwe MRDP/M23 dukomeje kurinda abaturage bari kugabwaho ibitero. Tuzatsindana iyi ntambara ishema. Urugamba rurakomeje.”
Ingabo za Leta ya RDC zimaze iminsi zigaba ibitero mu bice bikikije Komini Minembwe, zigamije kubigenzura. AFC/M23 na Twirwaneho bigaragaza ko abasivili benshi bari kwicirwa muri ibi bitero, abandi bagahunga.
